Crime : पुणे शहर पुन्हा एकदा दोन धक्कादायक घटनांमुळे हादरलं आहे एक तरुणाच्या संशयास्पद आत्महत्येची आणि दुसरी अल्पवयीन मुलीवरील अमानुष अत्याचाराची.
दिघी परिसरात राहणारा 19 वर्षीय अथर्व विजय देशमुख, जो AI विषयाचं शिक्षण घेत होता, त्याने 15 मार्च रोजी सायंकाळी सुमारे 7:30 वाजता गळफास घेऊन आयुष्य संपवलं. आई बाहेर गेलेली असताना अथर्वने घराच्या किचनमध्ये सीट बेल्टचा वापर करून आत्महत्या केल्याचं समोर आलं. आई घरी परतल्यावर दरवाजा उघडत नसल्याने शेजाऱ्यांच्या मदतीने आत प्रवेश केला असता, अथर्व मृत अवस्थेत आढळला. विशेष म्हणजे, आत्महत्येपूर्वी त्याने आपला मोबाईल पूर्णपणे फॉरमॅट केला होता, ज्यामुळे त्याच्या मनात काय सुरू होतं याचं उत्तर अजूनही सापडलेलं नाही.
अथर्व वाघोलीतील एका नामांकित कॉलेजमध्ये शिक्षण घेत होता. AI सारख्या स्पर्धात्मक क्षेत्रात शिकणाऱ्या विद्यार्थ्यांवर वाढत चाललेला मानसिक ताण, अपेक्षांचं ओझं आणि एकटेपणा हे घटक अशा घटनांच्या मागे असू शकतात, असं तज्ज्ञांचं मत आहे. त्यामुळे ही घटना केवळ एक आत्महत्या नसून, विद्यार्थ्यांच्या मानसिक आरोग्याच्या गंभीर प्रश्नाकडे लक्ष वेधणारी आहे.
दुसरीकडे, पुण्यातील एका उच्चभ्रू सोसायटीत 6-7 महिन्यांपासून सुरू असलेला अत्याचाराचा प्रकार उघडकीस आला आहे. एका अल्पवयीन आणि मतिमंद मुलीवर तिच्याच 3 नातेवाईकांनी वारंवार लैंगिक अत्याचार केल्याचं समोर आलं आहे. ही बाब उघड झाल्यानंतर परिसरात संताप आणि भीतीचं वातावरण निर्माण झालं आहे.
