नागपूर: नागपूरच्या जरीपटका परिसरात एक धक्कादायक घटना घडली आहे. या परिसरातील व्यक्तीने एका महिलेसह तिच्या २० वर्षीय मुलीवर बलात्कार केल्याचं समोर आलं आहे.नराधमाने लैंगिक अत्याचार करून पीडित मायलेकींचे अश्लील व्हिडीओ शूट केले. त्यानंतर समाज माध्यमावर व्हायरल केले आहेत. यानंतर पीडितेनं जरीपटका पोलीस ठाण्यात तक्रार दिली आहे. याप्रकरणी पोलिसांनी विविध कलमांतर्गत गुन्हा दाखल केला आहे.
पोलिसांनी दिलेल्या माहितीनुसार, जरीपटका परिसरात एक ४२ वर्षीय पीडित महिला वास्तव्यास आहे. पीडितेला दोन मुली आहेत. या पीडित महिलेचा पती मद्यपी असून तो बाहेरगावी वास्तव्याला असतो. पीडित महिलेची दहा वर्षांपूर्वी आरोपी सोबत ओळख झाली होती. त्यानंतर त्यांच्या ओळखीचं रुपांतर प्रेमात झालं.
या प्रकरणी अधिक माहिती अशी की, दोघांमध्ये प्रेमसंबंध जुळल्यानंतर नराधमआरोपीनं पीडित महिलेसोबत शारीरिक संबंध प्रस्थापित केले. नंतर याचे अश्लील व्हिडीओ चित्रित केले. नंतर व्हिडीओ व्हायरल करण्याची धमकी देत आरोपीनं पीडित महिलेच्या मोठ्या मुलीवर अत्याचार केला. आईचे व्हिडीओ व्हायरल करेन अश्या धमक्या देऊन आरोपीने मुलीवर लैंगिक अत्याचार केला. मुलीचेही व्हिडिओ त्याने काढले आणि नंतर पीडित महिलेला ब्लॅकमेल करू लागला. आरोपी मागील अनेक महिन्यांपासून दोघींनाही ब्लॅकमेल करत मायलेकींचं लैंगिक शोषण करत होता.
आरोपीने पिडीतेचं शोषण करून व्हिडिओ इन्स्टाग्राम वर प्रसारित केला. हा सर्व प्रकार पीडितेच्या लहाण्या मुलीच्या लक्षात आल्यानंतर महिलेनं पोलीस ठाण्यात धाव घेत तक्रार दाखल केली आहे. या प्रकरणी पोलिसांनी आरोपीविरोधात विविध कलमांतर्गत गुन्हा दाखल केला आहे. या घटनेचा पुढील तपास पोलीस करत आहेत.
