बीड: जिल्ह्यातील मस्साजोग गावचे सरपंच संतोष देशमुख यांच्या हत्येचे मन हलवून सोडणारे फोटो समोर आल्यानंतर आज बीड जिल्हा बंदची हाक देण्यात आलेली आहे. त्यानंतर जिल्ह्यातील केज शहरात बंदला प्रतिसाद देत सर्व तरुण आज रस्त्यावर उतरलेले आहेत. तेथील बाजारपेठ बंद करण्याचं आवाहन तरूणांकडून करण्यात येत आहे.
सर्व आरोपींना फाशीची शिक्षा द्यावी
अधिक माहिती अशी की, जिल्ह्यातील मस्साजोगचे सरपंच संतोष देशमुख यांच्या हत्येचा तपास पूर्ण झाल्यानंतर सीआयडीने आरोपपत्र सादर केलं. सीआयडीने सादर केलेल्या आरोपपत्रात संतोष देशमुख यांची हत्या करतानाचे आरोपींनी काढलेले व्हिडिओ आणि फोटो समोर आले आहेत. यामधून अत्यंत क्रूर पद्धतीने संतोष देशमुख यांचा छळ करून त्यांना मारण्यात आल्याचं पाहायला मिळत आहे. हत्या करतानाचे फोटो सोशल मिडियावर व्हायरल झाल्यानंतर आज संतोष देशमुख यांच्या समर्थकांकडून बीड बंदची हाक देण्यात आली. बाजारपेठ बंद करत धनंजय मुंडे आणि वाल्मिक कराड यांच्या विरोधात तरुणांनी जोरदार घोषणाबाजी केली. याबरोबरच या प्रकरणातील सर्व आरोपींना फाशीची शिक्षा द्यावी अशी मागणी तरुणांनी केली आहे.
