राजगुरुनगर : खेड तालुक्यातील १८ ग्रामपंचायतीच्या सरपंच पदाची आरक्षण सोडत गुरुवारी (दि. २७ फेब्रुवारी) जिल्हाधिकारी कार्यालयात होणार असल्याची माहिती तहसीलदार ज्योती देवरे यांनी दिली. ग्रामविकास विभाग मंत्रालय, मुंबई यांनी उच्च न्यायालयाने दिलेल्या निर्णयानुसार ५ मार्च २०२० च्या अधिसुचनेद्वारा ग्रामपंचायतीच्या निवडणुकांसाठी फेर आरक्षण निश्चित करणे आवश्यक असल्याने १ जानेवारी २०२४ ते ४ मार्च २०२५ या कालावधीत मुदत संपणाऱ्या ग्रामपंचायतीच्या सरपंच पदाचे आरक्षण सोडत निश्चित करण्यात आले.
पुणे जिल्हयातील बिगर अनुसूचित क्षेत्रातील ग्रामपंचायतीच्या अनुसूचित जाती, अनुसूचित जमाती, नागरीकांचा मागास प्रवर्ग, महिला राखीव, अनुसूचित जाती, अनुसूचित जमाती, नागरीकांचा मागास प्रवर्ग यातील महिलांसह जिल्हास्तरावर तालुकानिहाय सरपंच पदाकरिता आरक्षण सोडत निवासी उपजिल्हाधिकारी यांच्या अध्यक्षतेखाली जिल्हाधिकारी कार्यालयात आरक्षण सोडती काढण्यात येणार आहेत, अशी माहिती निवासी नायब तहसीलदार मदन जोगदंड यांनी दिली.
खेड तालुक्यातील खराबवाडी, जऊळके खुर्द, कोहींडे बु., सोळू, वडगाव घेनंद, धामणे, गुळाणी, रौंधळवाडी, आसखेड बु., आंबेठाण, वाशेरे, सायगाव, कंडाचीवाडी, बोरदरा, पाईट, कोये, खालुंब्रे, टेकवडी या ग्रामपंचायतींच्या सरपंच पदाचे आरक्षण सोडत होणार आहे. आरक्षण सोडतीला खेड तालुक्यातील सर्व आजी-माजी जिल्हा परिषद, पंचायत समिती, ग्रामपंचायतीच्या सदस्यासह, राजकीय पक्षाचे पदाधिकारी ग्रामस्थांनी उपस्थित रहावे, असे आवाहन प्रांत अनिल दौंडे यांनी केले आहे
