पुणे: पुणे जिल्ह्याला लवकरच दोन आमदार मिळणार असल्याची माहिती समोर येत आहे. राज्यात विधानसभा निवडणुका पार पडल्या आहेत. त्यानंतर आता राज्यात विधान परिषद निवडणुका जाहीर झाल्या आहेत. ही निवडणूक विधान परिषदेच्या पाच रिक्त जागांसाठी जाहीर करण्यात आली आहे. यामध्ये भाजप तीन, शिवसेना एक आणि अजित पवार राष्ट्रवादी एक अशा पाच जागांसाठी ही निवडणूक होणार आहे.
विधान परिषदेच्या या पाचही जागांसाठी महायुतीमध्ये मित्रपक्षांत मोठ्या प्रमाणात रस्सीखेच सुरू असल्याचे पाहायला मिळत आहे. विधान परिषदेचा आमदार होण्यासाठी आता इच्छुकांची भली मोठी गर्दी झाली आहे. त्यामुळे त्यांनी आपापल्या पक्षाच्या वरिष्ठांकडे जोरदार फिल्डिंग सुरू केल्याचेदेखील बोलले जात आहे. पुण्यातील दोन नेतेसुद्धा विधानपरिषदेच्या आमदारकीसाठी दावेदार असल्याची माहिती मिळते.
अजित पवार यांच्या नेतृत्वाखालील राष्ट्रवादी काँग्रेसकडून शहराध्यक्ष दीपक मानकर यांनी विधान परिषदेच्या आमदारकीसाठी दावा केल्याचे समोर आले आहे. मागील विधान परिषदेच्या निवडणुकीवेळी देखील मानकर यांनी संधी मिळावी म्हणून वरिष्ठांकडे मागणी केली होती. त्यांची संधी डावलल्यानंतर मानकरांनी थेट राजीनामा दिला होता. परंतु, त्यावेळेस पक्षश्रेष्ठींनी मानकरांची समजूत काढली होती. त्यामुळे यावेळी मानकरांना संधी देण्याची दाट शक्यता वर्तवली जात आहे.
भाजपचे माजी आमदार जगदीश मुळीक यांना देखील विधान परिषदेची उमेदवारी मिळणार, अशी शक्यता राजकीय वर्तुळातून वर्तवली जात आहे. विधानसभा निवडणुकीच्यावेळी अजित पवारांनी जगदीश मुळे यांना शब्द दिल्याची माहिती मिळते. त्यामुळे आता त्यांना उमेदवारी दिली जाण्याचा दाट शक्यता आहे. त्यामुळे आता पुण्याला दोन आमदार मिळणार? हे पाहणे महत्त्वाचे ठरणार आहे.
