पुणे : पुण्यात एका निवृत्त शिक्षकाची फसवणूक झाल्याचा प्रकार समोर आला आहे. तुपाच्या उत्पादनाची डीलरशीप देण्याचे आमिष दाखवून शिक्षकाची तब्बल 38 लाख रुपयांची फसवणूक करण्यात आली आहे. आता याप्रकरणी शहरातील अलंकार पोलीस ठाण्यात गुन्हा दाखल करण्यात आला आहे.
हा प्रकार मे 2024 ते 5 मार्च 2025 दरम्यान घडला. सुबोध विश्वनाथ शिरोडकर ( 55, रा. कर्वेनगर) असे गुन्हा दाखल झालेल्या इसमाचे नाव आहे. तर फसवणूक झाल्याप्रकणी रमेश रघुनाथ भुजबळ (61, रा. फुरसुंगी) यांनी तक्रार दिली आहे. त्यानंतर फिर्यादीनुसार शिरोडकर याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार रमेश रघुनाथ भुजबळ हे एक निवृत्त शिक्षक आहेत. आरोपी आणि ते एका तीर्थक्षेत्रावर भेटले होते. त्यानंतर त्यांच्यात ओळख झाली होती. त्यानंतर तक्रारदाराला तुपाच्या उत्पादनाची डीलरशीप देतो, असे सांगून आरोपीने सांगून तक्रारदारचा विश्वास संपादन केला. यासाठी त्याने तक्रारदारकडून वेळोवेळी 38 लाख 97 हजार रुपये घेतले. त्यांनंतर सुरुवातीला काही दिवस भुजबळ यांनी दिलेल्या रकमेवर नफा म्हणून काही पैसे गुन्हेगाराने दिले. मात्र, मुद्दल दिली नाही. शिरोडकर यांनी आजपर्यंत एकूण 38 लाख रुपये घेतल्याचे केलेल्या तक्रारीत नमूद करण्यात आले आहे. त्यानुसार शिरोडकर याच्यावर अलंकार पोलिसांनी गुन्हा दाखल केला असून पोलीस उपनिरीक्षक अभिजित काळे पुढील तपास करीत आहेत.
