पुणे: पुण्यात मेट्रो ट्रॅकवर राष्ट्रवादी शरदपवार गटाच्या कार्यकर्त्यांनी विविध मागण्यांसाठी आंदोलन केले. प्रत्येक शाळेत महापुरुषांचा इतिहास शिकविण्यात यावा, तरुणांना रोजगार मिळावा,महिला आणि तरुणीवरील लैंगिक अत्याचाराच्या घटना रोखल्या जाव्यात आणि आरोपींना कठोर शिक्षा व्हावी. अश्या मागण्या करत शरद पवार गटाच्या कार्यकर्त्यांनी मेट्रो ट्रॅकवर आंदोलन केले.
या मागण्यांसाठी शरद पवार गटाचे कार्यकर्ते आक्रमक झाले होते. शरद पवार गटाचे पुणे शहर उपाध्यक्ष नरेंद्र पावटेकर यांनी पुणे महानगरपालिकेच्या जवळील मेट्रो स्टेशनच्या ट्रॅकवर उभे राहून आंदोलन केले. आंदोलनावेळी एका कार्यकर्त्यांने अंगावर पेट्रोल टाकून आत्महत्येचा प्रयत्न केला.
दरम्यान, पोलीस उपायुक्त संदीपसिंग गिल यांनी आंदोलकांशी संवाद साधला. त्यावेळी पोलीस आणि आंदोलनकर्त्यांमध्ये बाचाबाची झाली. त्यामुळे पोलिसांनी आंदोलनकर्त्यांवर लाठीचार्ज केला. आणि मेट्रो ट्रॅकवरून सर्व आंदोलनकर्त्यांना बाजूला केले. त्यामुळे जवळपास तासभर मेट्रो सेवा बंद ठेवण्यात आली होती. त्यानंतर मेट्रो सेवा सुरळीत करण्यात आली.
