पुणे: राज्य सरकारच्या मुख्यमंत्री माझी लाडकी बहीण योजनेबाबत (Ladaki Bahin Yojana) सध्या मोठा संभ्रम निर्माण झाला होता. ई-केवायसीची मुदत संपल्याच्या बातम्या सोशल (Ladaki Bahin Yojana e-KYC) मीडियावर व्हायरल होत असल्याने अनेक लाभार्थी महिलांमध्ये चिंता वाढली होती. मात्र, महिला व बालविकास मंत्री आदिती तटकरे यांनी यावर स्पष्ट भूमिका घेत या अफवा असल्याचे सांगत महिलांना दिलासा दिला आहे. (Ladaki Bahin Yojana Update)
या योजनेअंतर्गत पात्र महिलांना दरमहा 1500 रुपये आर्थिक मदत दिली जाते. मात्र, या लाभासाठी ई-केवायसी प्रक्रिया पूर्ण करणे आवश्यक आहे. काही महिलांच्या ई-केवायसीमध्ये त्रुटी राहिल्याने त्यांना लाभ मिळण्यात अडचणी येत होत्या. यामुळे सरकारने दुरुस्तीची संधी देत 31 मार्च 2026 पर्यंत मुदत वाढवली आहे.
आदिती तटकरे यांनी स्पष्ट केले की, ई-केवायसीची प्रक्रिया अजूनही सुरू असून मुदत संपल्याबाबतच्या बातम्या पूर्णपणे चुकीच्या आहेत. विभागाकडून यासंदर्भात कोणतीही अधिकृत घोषणा करण्यात आलेली नसताना अशा बातम्या पसरवल्या जात असल्याने त्यांनी माध्यमांनाही तथ्य पडताळूनच वृत्त प्रसिद्ध करण्याचे आवाहन केले आहे.
या स्पष्टिकरणामुळे लाभार्थी महिलांमधील संभ्रम मोठ्या प्रमाणात दूर झाला आहे. सध्या 31 मार्चपर्यंत ई-केवायसी पूर्ण करण्यासाठी अजूनही वेळ उपलब्ध आहे. त्यामुळे ज्यांच्या प्रक्रियेत चुका आहेत किंवा ज्यांनी अद्याप केवायसी केलेली नाही, त्यांनी ही संधी गमावू नये.
एकूणच, ही योजना आर्थिकदृष्ट्या दुर्बल महिलांसाठी महत्त्वाची असल्याने त्याचा लाभ अखंडपणे मिळावा यासाठी वेळेत केवायसी पूर्ण करणे आवश्यक आहे. पुढील काही दिवसांत ही प्रक्रिया पूर्ण करून कोणतीही अडचण टाळणे हेच महिलांसाठी महत्त्वाचे ठरणार आहे.
