पुणे : पुण्यात रविवारी(16 मार्च) ला पार पडलेल्या राष्ट्रवादी काँग्रेस शरदचंद्र पवार पक्षाच्या आढावा बैठकीत खासदार सुप्रिया सुळेंनी मोठा गौप्यस्फोट केला आहे. त्या म्हणाल्या “मला कधी कधी वाटतं.. पक्ष फुटला ते बर झालं.. कारण पक्षात एक तर ते राहिले असते किंवा मी राहिले असते.. ते पक्षात असतानाही माझी त्यांच्याशी लढाई सुरूच होती.. जो माणूस स्वतःच्या बायकोच्या गाडीत बंदूक ठेवू शकतो अशा व्यक्तीसोबत मी काम करूच शकत नाही. असं म्हणत सुप्रिया सुळे यांनी मोठा गौप्यस्फोट केला आहे. व्हायरल झालेल्या ऑडिओ क्लिप मधून त्यांनी धनंजय मुंडेंवर टीका केली आहे.
… यावर मी त्यांना काय उत्तर देऊ?
पुढे त्या म्हणाल्या, तुम्ही एकदा बीडला जा.. संतोष भाऊच्या आईला भेटा, बायकोला भेटा.. महादेव मुंडेंच्या बायकोला भेटा त्यांच्या मुलाच्या डोळ्यातील अश्रू बघा.. काय चूक त्या लेकरांची.. महादेव मुंडेंची. मी तिथं गेले तर त्यांची बायको मला विचारत होती माझ्या लेकरांची चूक काय, काय उत्तर देणार मी त्यांना.. संतोष भाऊंच्या घरी गेल्यानंतर त्यांच्या आईने हात धरला आणि मला न्याय देणार का असा प्रश्न विचारला. शब्द दे मला सुप्रिया की तू मला न्याय देशील. मला कधी कधी वाटतं बरं झालं पक्ष फुटला. कारण जर ते या पक्षात राहिले असते तर ते तरी राहिले असते नाहीतर मी तरी राहिले असते. मी त्या पक्षात काम करूच शकत नाही जिथे असा माणूस असेल.
पक्षात असताना माझी लढाई त्यांच्याशी होती
सुप्रिया सूळे म्हणाल्या, संपूर्ण जगाला माहित आहे की, पक्ष एकत्र असताना माझी लढाई त्यांच्याशी होती. मी हे कधीही बाहेर बोलले नाही. पण आज संघटनेत बोलतेय. जो पुरुष स्वतःची बायको , जी आपल्या मुलांची आई आहे, तिच्या गाडीत बंदूक ठेवू शकतो. एक तर तो पुरुष नाहीच, अशा व्यक्तीसोबत मी काम करणार नाही. तेंव्हापासून ही लढाई सुरू झाली. आज पहिल्यांदाच मी हे बोलत आहे. मी कुणाला घाबरत नाही. मी विरोधी पक्षात आयुष्य घालवेल पण नैतिकता सोडणार नाही. मला कॉन्ट्रॅक्टरचे पैसे नकोय. माझं घर त्या पैशावर चालत नाही.
पक्ष फोडण्यात मुंडेंची भूमिका महत्वाची: सुप्रिया सूळे
खऱ्या अर्थाने कधीकाळी भाजपात असलेले धनंजय मुंडे अजित पवारांच्या पुढाकाराने राष्ट्रवादी काँग्रेसमध्ये आले होते. राष्ट्रवादीत आल्यानंतर वेळोवेळी अजित पवार धनंजय मुंडेच्या पाठीशी उभे राहिले. जेंव्हा राष्ट्रवादी काँग्रेसमध्ये फूट पडली तेंव्हा देखील धनंजय मुंडे यांची भूमिका अत्यंत महत्त्वाची होती. राष्ट्रवादीच्या नेत्या सुप्रिया सुळेंची ऑडिओ क्लिप व्हायरल झाल्याने राजकीय वर्तुळात एकच चर्चा रंगली आहे. यावर मुंडेंकडून काय उत्तर येतं हे पाहावं लागणार आहे.
