लोणी काळभोर, ता. 15 : वडील रागावल्याचा राग मनात धरून सख्ख्या बहिणी घरातून निघून गेल्याची धक्कादायक घटना घडली आहे. ही घटना कदमवाकवस्ती (ता. हवेली) परिसरात घडली असून रविवारी (ता.13) सकाळी सव्वा सहावाजण्याच्या सुमारास उघडकीस आली आहे. मात्र लोणी काळभोर पोलिसांनी कौशल्यपुर्वक तपास करून अवघ्या 24 तासाच्या आत मुलींचा शोध लावून त्यांना त्यांच्या पालकांकडे सुखरूप सुपूर्त केले आहे. लोणी काळभोर पोलिसांच्या या कामगिरीचे सर्वत्र कौतुक होत आहे.
कदमवाकवस्ती येथील एका 39 वर्षीय विवाहितेला दोन मुली आहेत. मोठ्या मुलीचे नाव सीता (बदललेले नाव) तर छोट्या मुलीचे नाव गीता (बदललेले नाव) आहे. सीता ही 18 वर्षाची असून तिने लोणी काळभोर परिसरात 12 वीचे शिक्षण पूर्ण केले आहे. ती सध्या घरीच असते. तर गीता ही लोणी काळभोर परिसरातील एका नामवंत शाळेत इयत्ता अकरावीच्या वर्गात शिक्षण घेत असून ती 17 वर्षाची आहे.
हनुमंत जयंतीच्या दिवशी लोणी काळभोर येथे मोठी यात्रा भरते. ही यात्रा पाहण्यासाठी सीता आणि गीता या बहिणी शनिवारी (ता.12) सायंकाळी सहा वाजण्याच्या गेल्या होत्या. यात्रा पाहून त्या दोघी घरी आल्या होत्या. तेव्हा रात्रीचे साडेनऊ वाजले होते. मुलींच्या वडिलांनी यात्रे मध्ये जास्त वेळ न थांबता एका तासामध्ये घरी येण्याची तंबी दिली होती. मात्र मुली उशिरा आल्याने मुलींचे वडील त्यांच्यावर खुप रागावले. त्यानंतर सर्वांनी रात्री एकत्र जेवण केले आणि मध्यरात्री एक वाजण्याच्या सुमारास सर्वजन झोपी गेले.
दरम्यान, सीता व गीता यांची आई नेहमीप्रमाणे सकाळी सव्वासहा वाजण्याच्या सुमारास उठल्या. तेव्हा दोन्ही मुली अंथूरणामध्ये दिसुन आल्या नाहीत. त्यांनी मुलींचा आजु बाजुसह परीसरात शोध घेतला पण त्या दोघी मिळून आल्या नाहीत. त्यानंतर त्यांनी त्वरित लोणी काळभोर पोलीस ठाणे गाठले. आणि मुलींच्या अल्पवयाचा फायदा घेवुन कोणीतरी अनोळखी इसमाने त्यांना फुस लावुन पळवून नेले. अशी तक्रार दिली. त्यानुसार लोणी काळभोर पोलीस ठाण्यात भारतीय न्याय संहीता 2023 कलम 137(2) या प्रमाणे गुन्हा दाखल करण्यात आला होता.
सदर गुन्ह्याचे गांभीर्य लक्षात घेऊन लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी पोलीस उपनिरीक्षक दिगंबर सोनटक्के व त्याच्या सहकाऱ्यांचे एक पथक तयार केले. त्यानंतर सदर गुन्हा उघडकीस आणण्याच्या सूचना दिल्या. सदर गुन्ह्याचा तपास करीत असताना, पोलिसांना तांत्रिक विश्लेषणाच्या आधारे दोघी मुली या अक्कलकोट येथे आहेत. तसेच मुलींना कोणी पळवून नेले नाही तर वडील रागावल्याने घरातून निघून गेल्या आहेत. अशी माहिती पोलिसांना एका खबऱ्यामार्फत मिळाली.
मिळालेल्या माहितीच्या अनुषंगाने लोणी काळभोर पोलिसांनी अक्कलकोट पोलिसांच्या मदतीने दोन्ही मुलींना सोमवारीच (ता.14) ताब्यात घेतले. दोन्ही मुलींना सुखरूप त्यांच्या पालकांकडे सुपूर्त केले. पोलिसांनी कौशल्यपूर्वक तपास करून अवघ्या 24 तासाच्या आत त्यांच्या पालकांकडे सुखरूप सुपूर्त केले आहे. लोणी काळभोर पोलिसांच्या या कामगिरीचे सर्वत्र कौतुक होत आहे.
ही उल्लेखनीय कामगिरी पुणे शहर पोलीस उप आयुक्त डॉ. राजकुमार शिंदे, सहाय्यक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, पोलीस उपनिरीक्षक दिगंबर सोनटक्के, रत्नदीप बिराजदार, पोलीस अंमलदार अमोल जाधव व त्याच्या सहकाऱ्यांनी केली आहे.
