मुंबई : राष्ट्रवादी काँग्रेस-शरदचंद्र पवार पक्षाकडून शॅडो कॅबिनेटची निर्मिती करण्यात आली आहे. या शॅडो कॅबिनेटच्या माध्यमातून माध्यमातून राज्य सरकारच्या 100 दिवसांच्या कार्यक्रमावर लक्ष ठेवण्यात येणार आहे. तसेच पक्षाच्या नेत्यांनाविभागवार जबाबदारी वाटून देण्यात आली आहे. त्या नेत्यांना महाराष्ट्र पिंजून काढण्याचे आदेश देण्यात आले आहेत. आज (दि. २८) शरद पवार यांच्या राष्ट्रवादी पक्षाची मुंबईत बैठक पार पडली. या बैठकीत पक्षाच्या संघटनात्मक बांधणीवर चर्चा करण्यात आली.
राष्ट्रवादी काँग्रेस शरदचंद्र पवार पक्षाच्या बैठकीला सर्व आमदारांची आणि खासदारांची उपस्थिती होती. पक्ष संघटन वाढीसाठी काही प्रमुख नेत्यांवर जबाबदारी देण्यात आली आहे. जयप्रकाश दांडेगावकर, शशिकांत शिंदे, जितेंद्र आव्हाड, राजेश टोपे, रोहित पवार, एकनाथ खडसे आणि हर्षवर्धन पाटील यांच्यावर पक्षाने जिल्ह्यांची जबाबदारी टाकली आहे.
सदर नेत्यांनी प्रत्येक महिन्यात जिल्ह्यांचे दौरे करून आढावा घेण्याचे आदेश शरद पवार यांच्याकडून देण्यात आले आहेत. तसेच जास्तीत जास्त तरुण चेहऱ्याला संधी देण्याची रणनीती देखील ठरवण्यात आली आहे. संघटनेत जिथे रिक्त पद असतील, तिथे पद भरली जाणार आहेत. जर पदाधिकारी बदलायची गरज वाटत असेल, तर पदाधिकारी देखील बदलले जातील.
पक्षाच्या नेत्यांनी, पदाधिकाऱ्यांनी नव्या उमेदीने कामाला लागण्याच्या सूचना शरद पवारांनी दिल्या आहेत. पुढच्या तीन महिन्यात महाराष्ट्र पिंजून काढा आणि त्याचा अहवाल द्या असे आदेश पवारांनी नेत्यांना दिले आहेत.
या बैठकीबाबत बोलताना पक्षाचे खासदार अमोल कोल्हे म्हणाले की, “राष्ट्रवादी काँग्रेस-शरदचंद्र पवार पक्षाच्या बैठकीत महत्वपूर्ण निर्णय झाले. त्यामध्ये महायुती सरकारच्या पहिल्या 100 दिवसांच्या कार्यक्रमावर लक्ष ठेवणारी टास्क टीम तयार करण्यात आली. तसेच विभागनिहाय जबाबदाऱ्यांचे वाटप करण्यात आले आहे. 7-8 मार्चपासून संबंधित नेत्यांना विभागनिहाय दौरे करण्याचे आदेश देण्यात आले आहेत.
