पुणे : सध्या निवडणूक आयोग पॅनकार्डप्रमाणेच आता मतदार ओळखपत्र आधारशी लिंक करण्याच्या योजनेवर गांभीर्याने काम करत आहे. या संदर्भात पुढील आठवड्यात निवडणूक आयोगाची एक महत्त्वाची बैठक होणार आहे. मुख्य केंद्रीय निवडणूक आयुक्त ज्ञानेश कुमार यांनी १८ मार्चला केंद्रीय गृह सचिव आणि कायदा व न्याय मंत्रालयाचे सचिव यांची बैठक बोलावली आहे. त्यामध्ये मतदार ओळखपत्रे आधारशी जोडण्याबद्दल चर्चा होणार आहे.
गेल्या काही महिन्यांपासून देशभरात मतदारयाद्यांमध्ये घोळ होत असल्याचेआरोप होत आहेत. त्या पार्श्वभूमीवर ज्ञानेश कुमार यांनी ही बैठक बोलावली आहे.निवडणूक पारदर्शकता वाढवण्याच्या उद्देशाने आता मतदार ओळखपत्र आधारशी लिंक करण्याच्या प्रक्रियेला गती दिली जाणार आहे. यासंदर्भात 18 मार्च रोजी मुख्य निवडणूक आयुक्त ज्ञानेश कुमार, निवडणूक आयुक्त सुखबीर सिंग संधू आणि निवडणूक आयुक्त विवेक जोशी हे केंद्रीय गृह सचिव गोविंद मोहन, सचिव राजीव मणी आणि यूआयडीएआयचे मुख्य कार्यकारी अधिकारी भुवनेश कुमार यांची भेट घेणार आहेत. त्यावेळी पॅनकार्डप्रमाणेच मतदार ओळखपत्रही ‘आधार’शी लिंक करण्यावर चर्चा केली जाणार असल्याची माहिती समोर आली आहे.
आतापर्यंत निवडणूक आयोगाने आधार आणि मतदार ओळखपत्राचा डेटाबेस लिंक केलेला नाही. डुप्लिकेट मतदार नोंदणी ओळखून मतदार यादी शुद्ध करता यावी यासाठी ही प्रक्रिया आता लवकरच सुरू करण्यात येणार आहे.
