पुणे : मुख्यमंत्री देवेंद्र फडणवीस यांच्या नेतृत्वाखालील महायुतीच्या सरकरमधील मंत्रिमंडळात स्थान न मिळालेले राष्ट्रवादी काँग्रेस अजित पवार गटाचे ज्येष्ठ आमदार आणि माजी मंत्री दिलीप वळसे पाटील यांची महाराष्ट्र इन्स्टिट्यूट फॉर ट्रान्सफॉर्मेशन अर्थात ‘मित्र’ च्या उपाध्यक्षपदी नियुक्ती करून त्यांचे पुनर्वसन करण्यात आले आहे. ‘मित्र’च्या उपाध्यक्ष पदावर वळसे-पाटील यांच्यासह भाजपचे राणा जगजितसिंह पाटील आणि शिवसेना शिंदे गटाचे आमदार राजेश क्षीरसागर यांना संधी देण्यात आली आहे. ‘मित्र’वर तीन उपाध्यक्ष नेमून सरकारने सत्तासमतोल साधला आहे.
राज्यातील कृषी संलग्न क्षेत्र, आरोग्य आणि पोषण, लघुउद्योग, उद्योग अशा १० महत्त्वाच्या क्षेत्रांवर काम करण्यासाठी ‘मित्र’ ची स्थापना करण्यात आली आहे. मित्रच्या कार्यक्षेत्रात कृषि आणि संलग्न क्षेत्र, आरोग्य आणि पोषण, शिक्षण, कौशल्य विकास आणि नाविन्यता, नागरिकरण, बांधकाम क्षेत्र विकास आणि भूमी प्रशासन, वित्त, पर्यटन आणि क्रीडा, ऊर्जा संक्रमण आणि वातावरणीय बदल, पायाभूत सुविधा, माहिती तंत्रज्ञान, पूरक सेवा आणि दळणवळण या क्षेत्रांचा समावेश आहे. मित्र संस्थेच्या नियामक मंडळाच्या रचनेत उपाध्यक्षांची संख्या ही दोन होती. आता उपाध्यक्षांची संख्या तीन करण्यात आली आहे. नियोजन विभागाने यासंदर्भातील शासन निर्णय जारी केला. या नव्या उपाध्यक्षांची मुदत आदेशाच्या दिनांकापासून दोन वर्ष अथवा पुढील शासन आदेश येईपर्यंत असेल, असे शासन निर्णयात नमूद केले आहे.
