पुणे : स्वारगेट बस स्थानक अत्याचार प्रकरणातील आरोपी नराधम दत्ता गाडे याला पुणे न्यायालयाने 12 मार्चपर्यंत पोलीस कोठडी सुनावली आहे. आरोपीला पुणे पोलिसांनी शिवाजीनगर कोर्टात हजर केले होते. याप्रकरणी आज सुनावणी पार पडली, त्यावेळेस कोर्टाने आरोपीला कोठडी सुनावली.आता पोलीस कोठडीत त्याची चौकशी केली जाईल त्यातून आणखी कोणत्या गोष्टींचा उलगडा समोर येतो हे पाहणे महत्त्वाचे ठरणार आहे.
पुण्यातील स्वारगेट एसटी आगारात 26 वर्षीय तरुणीवर अत्याचार झालेल्या घटनेने केवळ पुण्यातूनच नव्हे तर राज्यभरातून संताप व्यक्त केला जात आहे. या प्रकरणातील आरोपीच्या मुसक्या पोलिसांनी आवळल्या. आरोपी दत्ता गाडे याला त्याच्या शिरूर येथील गुनाट गावातून अटक करण्यात आली. रात्रीच त्याला पुण्यात आणण्यात आले त्यानंतर त्याची वैद्यकीय चाचणी घेण्यात आली. त्यानंतर पोलिसांनी संध्याकाळी मोठ्या बंदोबस्तात आरोपी दत्तात्रय गाडे याला जिल्हा सत्र न्यायालयामध्ये हजर केलं. आरोपीने याआधी अनेक महिलांवर अत्याचार केल्याचा संशय पोलिसांना आहे त्यानुसार स्वारगेट एसटी आगारामध्ये त्याने किती महिलांवर अत्याचार केले याचा तपास देखील पोलिसांना करायचा आहे.त्यामुळे कोर्टाने पोलिसांची मागणी मान्य करत आरोपीला पोलीस कोठडी सुनावली आहे.
दरम्यान या प्रकरणात आरोपीसोबत आणखी साथीदार आहेत का याचा तपास करायचा आहे.तसेच या प्रकरणातील आरोपीचा मोबाईल हस्तगत करायचा असून त्याला पोलीस कोठडी देण्यात यावी अशी मागणी करण्यात आली होती. आज कोर्टात हजर केल्यानंतर पोलिसांनी 14 दिवसाची पोलीस कोठडी मागितली. आरोपी दत्तात्रय गाडेवर एकूण सहा गुन्हे दाखल आहेत यामधील पाच गुन्ह्यात सहा महिला तक्रारदार आहेत. यावरूनच त्याचा महिलांकडे बघण्याचा दृष्टिकोन काय आहे स्पष्ट होतं त्यामुळे हा गुन्हा अत्यंत गंभीर स्वरूपाचा आहे. आरोपीच्या वकिलाने दोन दिवसाच्या पोलीस कोठडीची मागणी केली होती मात्र कोर्टाने आरोपी गाडेला 12 मार्चपर्यंत पोलीस कोठडी सुनावली आहे
