अक्षय टेमगिरे / रांजणगाव गणपती : शिरूर विधानसभा मतदार संघाच्या निवडणुकीत राष्ट्रवादी काँग्रेस पक्षाचे उमेदवार ज्ञानेश्वर उर्फ माऊली कटके यांनी राष्ट्रवादी काँग्रेस शरदचंद्र पवार पक्षाचे आमदार अशोक पवार यांचा ७४ हजार ६६८ मतांनी पराभव करून शिरूर हवेलीच्या गडावर आपले नाव कोरले आहे.
ही निवडणूक एकतर्फी झाली असल्याचे दिसून आले आहे. शिरूर हवेलीचे नवनिर्वाचित आमदार ज्ञानेश्वर उर्फ माऊली कटके यांच्या नावाची घोषणा निवडणूक निर्णय अधिकारी संगीता राजापूरकर व सहाय्यक निवडणूक अधिकारी बाळासाहेब म्हस्के यांनी करून आमदारकीचे सर्टिफिकेट त्यांना देण्यात आले.
पारोडी येथे ताशाचा गजर अन् गुलालाची उधळण
विजयानंतर शिरूर तालुक्यातील पारोडी येथील ग्रामस्थ व कार्यकर्त्यांनी ताशाच्या गजरात अन् गुलालाची उधळण व फटाक्याची आतिषबाजी करत विजयाचा जल्लोष साजरा केला. यावेळी पारोडी व पंचक्रोशीतील विविध राजकीय मंडळी यांनी ज्ञानेश्वर उर्फ माऊली आबा कटके यांच्या विजयात सहभागी होण्यासाठी मोठ्या उत्साहात पारोडी येथील चौकात अन् गावात मोठ्या संख्येने उपस्थित होते.
