IND vs AUS : ऑस्ट्रेलियाविरुद्धच्या पहिल्या कसोटी सामन्याच्या दुसऱ्या दिवशी भारतीय संघा बोलबाला दिसून आला आहे. पहिल्या डावात भारताची फलंदाजी 150 धावांवरच ढेपाळली होती. या धावांचा पाठलाग करताना ऑस्ट्रेलिया पहिल्या डावात केवळ 104 धावांपर्यंतच मजल मारू शकला. भारताकडे पहिल्या डावात 46 धावांची आघाडी होती. या आघाडीसह भारतीय संघाने दुसऱ्या डावाला सुरवात केली. पहिल्या डावात फेल गेलेल्या यशस्वी जयस्वाल आणि केएल राहुल यांनी चांगली सुरुवात करून दिली. दोघांनी मिळून 150 हून अधिक धावांची भागीदारी रचली. भारताने दुसऱ्या दिवसअखेर एकही गडी न गमवता 172 धावा केल्या आहेत. त्यामुळे 46 धावांची आघाडी पकडून भारताच्या 218 धावा झाल्या आहेत. केएल राहुल नाबाद 62, तर यशस्वी जयस्वाल नाबाद 90 धावांवर खेळत आहे.
यशस्वी जयस्वाल आणि केएल राहुल यांनी नाबाद अर्धशतकं झळकावून ऑस्ट्रेलियन गोलंदाजांना जेरीस आणलं. सुरुवातीला यशस्वी जयस्वाने मैदानात नांगर टाकला आणि सावधपणे खेळी करत राहिला. अर्धशतक झळकवण्यासाठी यशस्वी यशस्वालने 100 हून अधिक चेंडूंचा सामना केला. विशेष म्हणजे 2000 या वर्षानंतर पहिल्यांदाच म्हणजे 24 वर्षांनी ओपनिंग जोडीने ऑस्ट्रेलियात 50 हून अधिक षटकांचा सामना केला आहे. दरम्यान, केएल राहुलनेही दुसऱ्या डावात शानदार अर्धशतक ठोकलं. दोघांची फलंदाजी बघणं डोळ्यांचे पारणे फेडणारी अशीच होती.
ओपनिंगला उतरत ऑस्ट्रेलियाविरुद्ध दोन्ही बॅटर्सने अर्धशतक ठोकणारी चौथी जोडी आहे. सुनिल गावस्कर-चेतन चौहाना यानी 1981 मध्ये, सुनिल गावस्कर आणि ख्रिस श्रीकांत यांनी 1985 मध्ये, सुनिल गावस्कर आणि ख्रिस श्रीकांत यांनी 1986 मध्ये या जोडीने अर्धशतकी खेळी केली होती. आता 2024 मध्ये केएल राहुल आणि यशस्वी जयस्वाल या दोघांनी अर्धशतक ठोकलं आहे.
यशस्वी जयस्वाल एका कॅलेंडर वर्षात सर्वाधिक षटकार मारणारा फलंदाज ठरला आहे. यापूर्वी ब्रेंडन मॅकलमने 2014 मध्ये 33 षटकार मारले होते. आता यशस्वी जयस्वालने 33 षटकार मारत या विक्रमाची बरोबरी साधली आहे.
