लोणी काळभोर : जुन्या भांडणाचा राग मनात धरून चार जणांनी कोयत्याचा धाक दाखवून दोघांना मारहाण केली आहे. तर या मारहाणीत एकाच्या डोक्यात दगड घातल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील एमआयटी कॉर्नरजवळ गुरुवारी (ता. 21) रात्री साडेआठ वाजण्याच्या सुमारास घडली आहे. याप्रकरणी लोणी काळभोर पोलीस ठाण्यात चार जणांच्या विरोधात गुन्हा दाखल करण्यात आला आहे.
यश महेंद्र जैन (वय-18, रा संभाजी नगर, कदमवाकवस्ती, ता. हवेली) व रोहित राजेंद्र सकट (वय- 20, रा. गारुडी वस्ती, लोणी काळभोर, ता. हवेली) अशी मारहाण झालेल्या दोघांची नावे आहेत. तर फिरोज शेख (वय-20), आदित्य कलाने (वय-18), गणेश गोडसे (वय-18), व प्रशांत जेटीथोर (वय-19, सर्व रा. कदमवकवस्ती, लोणी काळभोर, ता. हवेली) अशी गुन्हा दाखल झालेल्या चार जणांची नावे आहेत.
पोलिसांनी दिलेल्या माहितीनुसार, फिर्यादी यश जैन व आरोपीं हे दोघे एकमेकांच्या ओळखीचे आहेत. फिर्यादी व आरोपींमध्ये काही दिवसांपूर्वी भांडणे झाली होती. या भांडणाचा आरोपींच्या मनात राग होता. दरम्यान, फिर्यादी यश जैन व त्याचा मित्र रोहित सकट हे दोघे दुचाकीवरून एमआय टी कॉर्नर येथे चहा पिण्यासाठी गुरुवारी रात्री साडे आठ वाजण्याच्या सुमारास गेले होते. चहा पिल्यानंतर फिर्यादी व त्याचा मित्र माघारी जात असताना, तेथे आरोपी फिरोज शेख आला. व फिर्यादी यांचा मित्र रोहित सकट यास म्हणाला, माझ्याकडे का बघतोस? असे म्हणाला. फिर्यादी व त्यांचा मित्र वाद नको म्हणून तेथून जाऊ लागले. तेव्हा फिरोजने शिवीगाळ करून हाताने मारहाण करू लागला.
त्यानंतर आरोपी फिरोजचे मित्र आदित्य कलाने, गणेश गोडसे व प्रशांत जेटीथोर हे तेथे आले. त्यानंतर चारही आरोपींनी फिर्यादी यश जैन व रोहित सकट या दोघांना मारहाण केली. फिरोजने यश जैनला खाली पडले व डोक्यात, हातावर व मानेवर दगडाने मारहाण केली. तर आरोपी आदित्य कलाने याने हातात कोयता घेऊन धाक दाखविला. व त्यानंतर चारही आरोपी घटनास्थळावरून रफुचक्कर झाले.
या मारहाणीत यश जैन हे किरकोळ जखमी झाले आहे. यश जैन यांनी वैद्यकीय उपचार घेतल्यानंतर लोणी काळभोर पोलीस ठाण्यात फिर्याद दिली आहे. त्यानुसार चार जणांच्या विरोधात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र करणकोट यांच्या मार्गदर्शनाखाली पोलीस हवालदार योगेश कुंभार करीत आहेत.
